--------------------------------------------------------------------------------
جمرةْ وله
أنا الهايم ..
يـ إنت الروح تاخذها
على ابساط الهوى عايم
أنا المَوْتور .. صاليني الزمن والخوف
أنا الشايف
أنا الطايف على بيت الرجا ملهوف
يبي اللحظه
على غيمة ْ لقا تبقى
أنا الحالم
على نبض العطش يرقص
شدا قلبي .. الشجن حارق
شدا يبكي
شدا يشكي
شدا القيثار نبضاته
شداها بعلّةْ ابياته
شدا المزفور
شدا من حرته العصفور
يرفرف شهقته بـ صوته:
أنا الواقف
على باب الرضا أنخاه .. لو يمطر نداه الكون
فـِ اعيوني
واشوفه بلحظه مسروقه
تردّ الروح تاليها
على رعشة ْ دفا القلبين
أبيه الحين
رجا قلبي
رجا موتي
أنا المجروح ..
أنا كلي سفينة نوح
أنوح الليل: أنا المذبوح
أنا المفضوح
أنا الغارق وانا المسفوح،
أبيه الحين ،
أنا الجاني وأظن مظلوم
ولا أقدر ...
أنا العابد لبسني الضيم
أنا الشاهد
عماني الشوق
ولا أقدر .. ألبّي له ،
أشِدّ اجروح أيامي
بأحلامي
بأحلام الشذا الأولى
تواسيني رسالة ْ شوق
أدللها وأعللها و أوصّلهااااا
لآخر سلّة ْ ايامي
أنا الشارب خمر روحك
حبيبي .. !!
وقلبي ما يرواك.