%وين أنت غايب%

وين انت غايب يانظر عين مغليـك
نسيتنـي ولاّ غيـابـك غصيـبـه
بالله خبرنـي عسـى الله يخلـيـك
تراي من فرقـاك حالـي صعيبـه
تعبت في غيبتـك والعيـن تنبيـك
بدموعها اللي فـوق خـدي سكيبـه
ماغير افكر فيك واسهـر واناديـك
يوم ان خالي البـال نومـه بجيبـه
زادت همومي والسبب من تجافيـك
وياويـل عشّـاقٍ تـردى نصيبـه
اشتقت لك واشتقت لمسـة اياديـك
واشتقت اضمك بعد طـول المغيبـه
وشلون تتركني وانـا ميّـتٍ فيـك
وتقسى على قلبٍ جروحـه عطيبـه
أن كان موتي مايمنى الروح يرضيك
هـذي تراهـا منـك والله غريبـه
والاغرب إني اشتكي منـك وإليـك
وإنك سبب جرح الضمير وطبيبـه
بالله جـاوب مـن يحبـك ويغليـك
أنته رضيت البعـد ولا غصيبـه


تحياتي